Other LanguagesAugust 12, 2025
SEATTLE —Washington a pwopwutani ew hotline ren osukosuken kopwut me nifinifin aramas me non ekkei unungat county non unusen ei state. has launched a hate crimes and bias incidents hotline pilot in three counties across the state Anongonong won met mei wor ren FBI (Putain Ponis an Mwuunap) ren osukosuken kopwut, Washington mei pachenong nein ekkewe nimuw state ra kon wate repwoten osukosuken kopwut me non seni non ewe 2018. Ewe hotline en esapw-emergency mei awora ngeni aramas non ekkewe county ren Clark, King me Spokane ew pwan anen ar repwe tongeni repwotei osukosuken kopwut me nifinifin aramas.
Osukosuken kopwut me nifinifin aramas mei watte efeiengawan ngeni aramas, famini, me pwan ekkewe community, mei awora ngeni aramas ar repwe mefi pwe rese ketiw ika rese safe me iawe re nonnomw ian. Ekkewe chon angangen ewe hotline repwe anisi ngeni chon kokko ekkewe sokkun aninis mei sinei eoreni, mei tumwunuw chon feiengaw, me weweiti osukosuk, nge epwe mwumwuta seni ewe chon kokko, epwe tongeni aninis ren repwoten ewe osukosuk mei fis ngeni pekin opochokuna onnuk.
Ewe hotline repwe kokkori 1-855-225-1010. Ion mei mochen epwe repwotei ew osukosuken kopwut ika nifinifin aramas me non ekkewe unungat county ra tongeni repwe pwan nongeni ika tota won ewe atg.wa.gov/report-hate.
Ewe Legislature (anepwung) a forata ewe hotline non ewe 2024 nupwen a anganga ewe Senate Bill (Noun Senate Taropwen Forun Ennuk nampa) 5427 (Foosun Merika) fiti aninis seni me ruu pekin. Ewe bill mei menei ewe aewin prokram, epwe omwokut meren ewe Attorney General’s Office (Ofesin AG), ren ewe hotline me non ekkewe unungat county non Washington state — pachenong pwan ew me non eotiwen Washington. Unungat ekkewe county ra kefinita anongonong won ukukun data mei wor ren osukosuken kopwut non ewe 2023 seni ewe Washington Association of Sheriffs and Police Chiefs’ Annual Crime Report (Repotun Foforungaw anein Ier).
Ewe aewin prokram epwe sopwosopwono non ukukun ew esopw ier, iwe ewe hotline epwene pwoputa me non state unus non January 2027. Osukosuken kopwut me nifinifin aramas mei kukkun repwotun, iwe data ren ifan ukukun choufetanin mei chok kukkun. Pwota seni non July 1 2027, ewe Attorney General’s Office epwe ne fori an repwot iteiten ier an epwe awewei ukukun data mei repwot seni ewe hotline fan iten ewe kepina, state, Legislature me aramas meinisin ren ewe osukosuken kopwut me nifinifin aramas.
“Osukosuken kopwut ese chok efeiengawa aramas pwe a pwan efeiengawa unusen ewe community,” Attorney General Nick Brown a apasa. “Fetaneochun me non ekkewe unungat county epwe tongeni anisikich ach sipwe acheuwano ewe hotline ngeni non state unus me ach sipwe pwan tongeni weweochuti ifan ussun ach sipwe angang ngeni ei osukosuken kopwut me nifinifin aramas an epwe wesino me non unusen Washington.”
Chon ewe pekin awora kapasen ourour me ekkewe pwusin nouwisin non ekkewe neni ra awora ar pworous fan iten pwoputan ei houtline:
“Sia pwoputani ew auchean omwokut non 2019 ren ach sia ekkesiwini ekkewe onnukun osukosuken kopwut — nge mei chiwen chok watte met sipwe fori pwokiten mei chok napeno ei osukosuken kopwut me nifinifin aramas,” Sen. Javier Valdez, D-Seattle a apworousa, ii ewe a wisen sponsorini ewe onnuk ren forutan ewe hotline “Ina pwata ewe hotline mei fokkun namwot. Esapw chok fan iten peekin onnuk — fan iten ekkewe aramas. Fan iten sipwe rongorong met mongungun ekkewe victim ika chon feiengaw me awora aninis ngenir”
“Non fansoun ei mwuun federal mei awateno an angangen nifinifin ika kopwut ngeni ekkewe community rese kon kan watte ar pochokun, mei chommong me non King County ir mei nomw non ar nuokus ika fen tipemwaremwar,” King County Council Chair Girmay Zahilay a apasa. “Uwamen fokkun pwapwa ai upwe fiti ewe Attorney General’s Office non ei angang iwe uwamen pwan kinisou ngeni ekkewe souemwenin ekkewe community ir mei pwan pachenong non omwokutun pwoputan ei angang. Chufengen, kich meinisin sipwe sopweno ach uuta non tipeew ne uu ngeni kopwut.”
“Spokane mei fokkun etiwa ei angangen pwoputani ei minafon Hate Crimes & Bias Incidents Hotline (Nampan Fonun Osukosuken Afeiengawen Eimwumwu) iwe mei pwan pwapwaasini an ew e nein ekkewe unungat neeni repwe tesini ei angang,” Spokane Mayor Lisa Brown a apasa. “Ach Office of Civil Rights, Equity, an Inclusion, (Ofesin an Aramas Pwuung, Anonopoku, me Apachanong Meinisin), a fen piin angange fengen me ewe kumi an ewe Attorney General seni ewe fansoun a pwoputa angangan, iwe kich mei kuna pwe ei mettoch mei fokkun auchea an epwe emwirineow angangen repwot me nengeifichi pwonuetan me non ach kewe community.”
“Uwa men pwapwa ren Spokane county a wisen emweni ei angangen pwoputan Hate Crimes Hotline,” Spokane County Commissioner Amber Waldref a apasa. “Ngang mei nukunuk pwe ei mettoch epwe awora anen ngaseno ngeni chon neniach kewe ar repwe tufichin repwotei sokkun osukosuken kopwut iwe epwene fokkun wor tumwunun meinisin chon non ach kewe community.”
“Ei hotline mei fokkun auchea ngeni an epwe wor an aramas repwe mefi pwe ir mei safe ne repwotei ekkewe osukosuken kopwut,” Clark County Sheriff John Horch a apasa. “Sia mochen pwe meinisin chon non ach we community repwe sinei pwe ar mengungu mei fokkun namwot, iwe mei pwan wor aninis ngenir.”
“Ekkewe community ren chon Asia, Chon Hawaii,me Chon Fonuen Pacific ir ra fen piin mefi me kuna osukosuken kopwut me nifinifin aramas non chommong ier iwe mei fokkun napeno non ewe fansoun pandemic,” Thanh Tran, ewe co-chair ren ewe HAPPEN Business Resource Group a apasa. “Ekkei mettoch mei fis mei chok sopwosopw iteiten ran, fiti ngeni an ese watte pworousan won ekkewe pekin news. Uwa anean pwe ei hotline epwe pessei ngeni ekkewe ir mei fis ngenir ekkei osukosuk ar repwe repwotei ekkei sokkun osukosuk pwun sipwe tongeni aninis ne apochokuna ekkewe community, me mwokutuno won angangen opwungu me angasano.”
“Ewe hotline mei fokkun auchea pwokiten mei etiwa met mei fat ngeni ach kewe community: pwe kopwut ese chok fis me non awewen ekkewe onnuk mei tichik pwe ren efeiengawen inis me atai pisek,” Catalina Velasquez, ewe executive director ren ewe Washington Immigrant Solidarity Network a apasa. “Nupwen ekkewe famini an chon etto me ekis me non non ai we kinikin repwe churi sokkun pworous mei erriafour ena mei forata ar repwe nuokus ne tinano nour kewe semirit repwe sukun, nupwen emon aramas mei transgender nge ii emon mei sakono onuwen unuchan epwe churi sokkun weires iteiten ran fan iten nikinikin inisin ena mei ekisano ekiekin pwe ii emon arams, nupwen ekkewe mei mwukeno epwe wor chon erenir pwe repwe 'niwin sefan ngeni ian re feito me ian' — ikkei ekkei sokkun fofforun osukosuk ra forata ifan ussun nonnomwun ekiekich ngeni ach sipwe nomw non kinamwe ika tumwun won ei fonufan. Ewe hotline mei fori neni fan iten ekkei sokkun mettoch mei fis an epwe nomw non taropwe, repwe nukuw, ewe epwe wor wor ponuwan non weweochun ew me ew eoreni, epwe pwan rumwun ren pekin pworous fan iten trauma.”
“Ai mochen pwe ewe hotline epwe mwutata ekkewe minne ir mei churi osukosuk ren kopwut repwe mefi pwe mei wor epwe anisir me non ar kewe pusin community,” Hershel Zellman, emon chon ewe board ren pekin Human Rights Spokane, a apasa. “Ngang uwa pwan mochen pwe ewe statistic mei kochufengen seni ewe hotline epwe ina met epwe anisi ngeni an epwe kawor prokramen osukun me opochokuna ekkewe onnuk fan iten epwe awesano an epwe fis kopwut ”
“Sia anean pwe ei hotline epwe awora sokkun aninis mei weweoch ngeni ew me ew eoreni, epwe forata angangen nukunukun ngeni ekkewe community an Muslim, iwe pwe pwan pesei ngeni chon ekkewe community are repwe repwotei osukosuk mei fis,” Sabrene Odeh, emon chon chumani pekin onuk non ewe Council on American-Islamic Relations me non Washington state a apasa. “Sia aneanei pwe epwe tongeni awora an epwe napeno weweochuti ei Islamophobia ika angangen kopwut ngeni Islam, epwe pwan eochueno prokram mei wor me non ekkewe community, iwe epwe pwan awora aninis epwe eochungeni chon ach kewe community. An wor tumwun ekkewe community an Muslim nupwen fansoun an forutan ei hotline mei anis ngeni ekkewe Muslim ar repwe mefi pwe ir mei pwan auchea.”
“Ach iwe organization ew nenien touren pworous mei wor nukunuk non fan iten ekkewe community sia angang fan iter,” Momodou Jobe, meinapen ewe prokram ren Washington West African Center a apasa. “Ach mengungu a feito seni met ach kewe community mei apworousa ngeni kich me pwan ach pachenong non forutan ei hotline mei uweianong mengungun ach iwe community non ewe room.”
“Mei chommong chon ekkewe community an Jewish mei resin fiu ngeni ewe angangen antisemitism ika chon ungeni chon Jews iwe mei pwan menei an epwe awateno met sokkun pekin aninis,” Miri Cypers, meinapen ewe Anti-Defamation League me non ewe kinikinin Pacific Northwest a apasa. “Seni nouch kewe kukkun semirit mei churi weires ren osukosuken nifinifin aramas me non ar kewe sukun non K-12 tori pwan weiresin osukosuk me non ekkewe mwicheich non community, ewe hotline epwe awora sokkun aninis mei wewefichiti eorenien ew me ew neni.”
“Ewe Sikh community mei fokkun uta fan iten pwuung me ew chok fan iten meinisin,” Jasmit Singh, ewe meinapen ewe Khalsa Gurmat Center a apasa. “Sia mwareiti ei angangen forutan ewe hotline ussun ew auchean omwokut fan iten ekkewe ir mei mefi eimwumwu ngenir ika kopwut ren an epwe tongeni wor chon afani ar mengungu me an epwe wor pworous won met osukosuke mei fis. Ei hotline mei opochokuna ekkewe community me pwan opochokuna ewe pworous pwe kopwut ese wor nenian me non Washington state.”
Ren sopwosopwun pworous won an Washington iwe hotline ren osukosuken kopwut me nifinifin aramas, no ngeni ewe atg.wa.gov/report-hate.
Wewen
Onnukun Washington mei awewei osukosuken kopwut pwe mei afeiengaw, mei atai pisek ina neni ika fen pwan osukosuk mei forata feingawen inis ika atai pisek nge mei fiis pwokiten an emon nenengeni ussun nikinikin ewe aramas ren ii chon ia, mei ifan onuwen unuchan, an namanam, ifan neoton, ian e feito me ian, ii emon mwan ika fefin, ifan ussun an ekieki ngeni inisin ika ii emon met, ika ren tufichingawen an inisin tongeni.
Osukosuken nifinifin aramas ikkena fofforun kopwut ese tipis me non ururun iwe ese pwan pachenong aosukosuk, ika atai neni me pisek. Ika mwo pwe osukosuken nifinifin aramas rese nomw non tettenin an emon epwe tipis, mei chok auchea pwe epwe wor repwot won.
-30-
Ewe Washington Attorney General mei angang fan iten ekkewe aramas me ewe state ren Washinton. Ussun ew watten ofesin onnuk me non ewe state, ewe Attorney General’s Office mei awora chon tupwuni pekin onnuk ngeni meinisin ekkewe agency non ewe state, board, me ewe commission non Washington. Pwan ew, ewe Ofes mei angang fan iten aramas ren an apochokuna tumwunun chon kamo, an pwungun aramas, me annukun tumwunun neni. Ewe Ofes mei pwan apungu angangen kirikiringaw ngeni chinap, sona ren Medicaid, me pwan anganga case ren chon kirikiringaw ngeni fefin me ren 38 county me non ekkewe 39 county non Washington. No ngeni www.atg.wa.gov ren sopwosopwun pworous.
Touren Pworous:
Email: press@atg.wa.gov
Fon: (360) 753-2727
Unusen touren pworous: Tiki ikei (Foosun Merika)