Other Languagesਇਸ ਭਾਸ਼ਾ ਵਿੱਚ ਹੋਰ ਸਰੋਤ ਵੀ ਉਪਲਬਧ ਹਨ।
ਵਿਅਕਤੀਆਂ ਅਤੇ ਪਰਿਵਾਰਾਂ ਦੀ ਸਾਲਾਨਾ ਆਮਦਨ ਦੇ ਆਧਾਰ 'ਤੇ ਵਾਸ਼ਿੰਗਟਨ ਨਿਵਾਸੀ ਰਾਜ ਦੇ ਹਸਪਤਾਲਾਂ ਵਿੱਚ ਮੁਫ਼ਤ ਜਾਂ ਘੱਟ ਖਰਚੇ ਵਾਲੇ ਇਲਾਜ ਲਈ ਯੋਗ ਹੋ ਸਕਦੇ ਹਨ। ਇਹ ਸਹੂਲਤਾਂ ਹਸਪਤਾਲ ਦੇ ਉਹਨਾਂ ਖਰਚਿਆਂ 'ਤੇ ਲਾਗੂ ਹੁੰਦੀਆਂ ਹਨ ਜੋ ਤੁਹਾਨੂੰ ਆਪਣੀ ਜੇਬ ਵਿੱਚੋਂ ਭਰਨੇ ਪੈਂਦੇ ਹਨ ਜਿਸ ਵਿੱਚ ਸਹਿ-ਭੁਗਤਾਨ ਅਤੇ ਕਟੌਤੀਯੋਗ ਰਕਮਾਂ ਵੀ ਸ਼ਾਮਲ ਹਨ। ਹਸਪਤਾਲ ਦੇ ਬਿੱਲਾਂ ਲਈ ਮਿਲਣ ਵਾਲੀ ਇਸ ਕਿਸਮ ਦੀ ਵਿੱਤੀ ਸਹਾਇਤਾ ਨੂੰ “ਚੈਰਿਟੀ ਕੇਅਰ” ਕਿਹਾ ਜਾਂਦਾ ਹੈ।
ਸਾਲ 2022 ਵਿੱਚ, ਚੈਰਿਟੀ ਕੇਅਰ ਲਈ ਆਮਦਨ ਦੀਆਂ ਸ਼ਰਤਾਂ ਵਿੱਚ ਵੱਡੀ ਤਬਦੀਲੀ ਕੀਤੀ ਗਈ ਸੀ ਜਿਸ ਦੇ ਨਤੀਜੇ ਵਜੋਂ ਨਵੇਂ ਕਾਨੂੰਨ ਦੇ ਅਧੀਨ ਹਜ਼ਾਰਾਂ ਹੋਰ ਵਾਸ਼ਿੰਗਟਨ ਨਿਵਾਸੀ ਹਸਪਤਾਲ ਵਿੱਚ ਮੁਫ਼ਤ ਜਾਂ ਘੱਟ ਖਰਚੇ ਵਾਲਾ ਇਲਾਜ ਕਰਵਾਉਣ ਦੇ ਯੋਗ ਹੋ ਗਏ। ਇਹ ਦੇਖਣ ਲਈ ਕਿ ਕੀ ਤੁਸੀਂ ਚੈਰਿਟੀ ਕੇਅਰ ਦੇ ਯੋਗ ਹੋ, ਕਾਨੂੰਨ ਅਨੁਸਾਰ ਆਮਦਨ ਦੀਆਂ ਸ਼ਰਤਾਂ ਬਾਰੇ ਵਧੇਰੇ ਜਾਣਕਾਰੀ ਲਈ Washington State Department of Health (ਵਾਸ਼ਿੰਗਟਨ ਰਾਜ ਦੇ ਸਿਹਤ ਵਿਭਾਗ) ਦੀ ਵੈੱਬਸਾਈਟ (ਅੰਗਰੇਜ਼ੀ) 'ਤੇ ਜਾਓ।
ਚੈਰਿਟੀ ਕੇਅਰ ਪ੍ਰਾਪਤ ਕਰਨ ਲਈ, ਤੁਹਾਨੂੰ ਹਸਪਤਾਲ ਵਿੱਚ ਅਰਜ਼ੀ ਦੇਣੀ ਪਵੇਗੀ। ਚੈਰਿਟੀ ਕੇਅਰ ਦਾ ਕਾਨੂੰਨ ਇੱਕ ਅਜਿਹੀ ਘੱਟੋ-ਘੱਟ ਸੀਮਾ ਤੈਅ ਕਰਦਾ ਹੈ ਜਿਸ ਦੀ ਪਾਲਣਾ ਕਰਨੀ ਹਸਪਤਾਲਾਂ ਲਈ ਲਾਜ਼ਮੀ ਹੈ ਪਰ ਹਸਪਤਾਲਾਂ ਨੂੰ ਆਪਣੀਆਂ ਨੀਤੀਆਂ ਵਿੱਚ ਵਧੇਰੇ ਰਾਹਤ ਦੇਣ ਦੀ ਖੁੱਲ੍ਹ ਵੀ ਹੈ (ਜਿਵੇਂ ਕਿ, ਵੱਧ ਆਮਦਨ ਵਾਲੇ ਮਰੀਜ਼ਾਂ ਨੂੰ ਵੀ ਚੈਰਿਟੀ ਕੇਅਰ ਦੇਣਾ)। ਵਧੇਰੇ ਜਾਣਕਾਰੀ ਲੈਣ ਲਈ, ਉਸ ਹਸਪਤਾਲ ਦੇ ਵਿੱਤੀ ਸਲਾਹਕਾਰ ਨਾਲ ਗੱਲਬਾਤ ਕਰਨਾ ਹਮੇਸ਼ਾ ਚੰਗਾ ਵਿਚਾਰ ਹੁੰਦਾ ਹੈ ਜਿੱਥੋਂ ਤੁਸੀਂ ਇਲਾਜ ਕਰਵਾਇਆ ਹੈ।
ਜੇਕਰ ਤੁਹਾਨੂੰ ਲੱਗਦਾ ਹੈ ਕਿ ਤੁਹਾਡਾ ਹਸਪਤਾਲ ਕਾਨੂੰਨ ਦੀ ਪਾਲਣਾ ਨਹੀਂ ਕਰ ਰਿਹਾ ਤਾਂ ਮੁੱਖ ਸਰਕਾਰੀ ਵਕੀਲ ਕੋਲ https://www.atg.wa.gov/file-complaint (ਅੰਗਰੇਜ਼ੀ) 'ਤੇ ਸ਼ਿਕਾਇਤ ਦਰਜ ਕਰਵਾਓ। ਜੇਕਰ ਤੁਹਾਨੂੰ ਕਿਦੁਭਾਸ਼ੀਆ ਜਾਂ ਅਨੁਵਾਦ ਸੇਵਾਵਾਂ ਦੀ ਲੋੜ ਹੈ, ਤਾਂ ਕਿਰਪਾ ਕਰਕੇ ਸਾਡੇ ਨਾਲ
(360) 753-6200 'ਤੇ ਸੰਪਰਕ ਕਰੋ ਅਤੇ ਭਾਸ਼ਾ ਸੰਬੰਧੀ ਸਹਾਇਤਾ ਲਈ ਕਹੋ।
ਅਕਸਰ ਪੁੱਛੇ ਗਏ ਸਵਾਲ
"ਚੈਰਿਟੀ ਕੇਅਰ" ਕੀ ਹੈ?
ਵਾਸ਼ਿੰਗਟਨ ਦਾ ਚੈਰਿਟੀ ਕੇਅਰ ਕਨੂੰਨ ਮੰਗ ਕਰਦਾ ਹੈ ਕਿ ਹਸਪਤਾਲ ਘੱਟ ਆਮਦਨ ਵਾਲੇ ਮਰੀਜ਼ਾਂ ਨੂੰ ਉਹਨਾਂ ਦੀ ਜੇਬ ਵਿੱਚੋਂ ਹੋਣ ਵਾਲੇ ਮੈਡੀਕਲ ਖਰਚਿਆਂ ਵਿੱਚ ਮਦਦ ਕਰਨ ਲਈ ਉਹਨਾਂ ਨੂੰ ਵਿੱਤੀ ਸਹਾਇਤਾ ਉਪਲਬਧ ਕਰਵਾਉਣ। ਇਹ ਗੱਲ ਸਪਸ਼ਟ ਕਰ ਦਈਏ ਕਿ ਅਸੀਂ ਉਹਨਾਂ ਲੋਕਾਂ ਦੀ ਗੱਲ ਕਰ ਰਹੇ ਹਾਂ ਜਿਨ੍ਹਾਂ ਕੋਲ ਬੀਮਾ ਹੈ, ਅਤੇ ਜਿਨ੍ਹਾਂ ਕੋਲ ਬੀਮਾ ਨਹੀਂ ਹੈ ਉਹ ਵੀ ਇਸ ਵਿੱਚ ਸ਼ਾਮਲ ਹਨ। ਬਹੁਤ ਸਾਰੇ ਲੋਕਾਂ ਨੂੰ ਬੀਮੇ ਹੋਣ ਦੇ ਬਾਵਜੂਦ ਜੇਬ ਵਿੱਚੋਂ ਭਾਰੀ ਖਰਚੇ ਅਦਾ ਕਰਨੇ ਪੈਂਦੇ ਹਨ ਅਤੇ ਸਾਡਾ ਚੈਰਿਟੀ ਕੇਅਰ ਕਨੂੰਨ ਉਹਨਾਂ ਵਿਅਕਤੀਆਂ ਦੀ ਮਦਦ ਕਰਦਾ ਹੈ।
ਕੀ ਕੋਈ ਘੱਟੋ-ਘੱਟ ਉਮਰ ਦੀ ਸੀਮਾ ਹੈ?
ਨਹੀਂ। ਯੋਗਤਾ ਲਈ ਕੋਈ ਘੱਟੋ-ਘੱਟ ਜਾਂ ਵੱਧ ਤੋਂ ਵੱਧ ਉਮਰ ਦੀ ਸੀਮਾ ਨਹੀਂ ਹੈ। ਸਾਰੇ ਵਾਸ਼ਿੰਗਟਨ ਵਾਸੀ ਯੋਗ ਹਨ।
ਕੀ ਚੈਰਿਟੀ ਕੇਅਰ ਦੀ ਵਰਤੋਂ ਕਰਨ ਲਈ ਤੁਹਾਡੇ ਕੋਲ Medicare ਜਾਂ Medicaid ਹੋਣਾ ਚਾਹੀਦਾ ਹੈ?
ਨਹੀਂ, ਚੈਰਿਟੀ ਕੇਅਰ ਸਾਰੇ ਵਾਸ਼ਿੰਗਟਨ ਵਾਸੀਆਂ ਉੱਤੇ ਲਾਗੂ ਹੁੰਦਾ ਹੈ, ਭਾਵੇਂ ਉਨ੍ਹਾਂ ਕੋਲ ਜਨਤਕ ਮੈਡੀਕਲ ਬੀਮਾ ਹੋਵੇ, ਪ੍ਰਾਈਵੇਟ ਮੈਡੀਕਲ ਬੀਮਾ ਹੋਵੇ ਜਾਂ ਭਾਵੇਂ ਬੀਮਾ ਨਾ ਵੀ ਹੋਵੇ। ਚੈਰਿਟੀ ਕੇਅਰ ਸਿਰਫ਼ ਤੁਹਾਡੀ ਆਮਦਨੀ ਦੇ ਪੱਧਰ ਦੇ ਆਧਾਰ 'ਤੇ, ਤੁਹਾਡੀ ਜੇਬ ਵਿੱਚੋਂ ਹੋਣ ਵਾਲੇ ਖਰਚਿਆਂ ਨੂੰ ਕਵਰ ਕਰਦੀ ਹੈ, ਭਾਵੇਂ ਤੁਹਾਡੇ ਕੋਲ ਕੋਈ ਵੀ ਬੀਮਾ ਨਾ ਹੋਵੇ।
ਕੀ ਚੈਰਿਟੀ ਕੇਅਰ ਲਈ ਅਰਜ਼ੀ ਦੇਣ ਲਈ ਮੈਨੂੰ ਸੰਯੁਕਤ ਰਾਜ ਦਾ ਨਾਗਰਿਕ ਹੋਣਾ ਜ਼ਰੂਰੀ ਹੈ?
ਨਹੀਂ, ਸਾਰੇ ਮਰੀਜ਼ ਚੈਰਿਟੀ ਕੇਅਰ ਲਈ ਅਰਜ਼ੀ ਦੇ ਸਕਦੇ ਹਨ, ਭਾਵੇਂ ਉਹ ਪ੍ਰਵਾਸੀ ਹੋਣ।
ਕੀ ਚੈਰਿਟੀ ਕੇਅਰ ਪ੍ਰਾਪਤ ਕਰਨ ਨਾਲ ਸਮਾਜਿਕ ਸੁਰੱਖਿਆ, Medicare ਜਾਂ Medicaid ਲਈ ਮੇਰੀ ਯੋਗਤਾ ਪ੍ਰਭਾਵਿਤ ਹੁੰਦੀ ਹੈ?
ਅਜਿਹਾ ਨਹੀਂ ਹੁੰਦਾ। ਚੈਰਿਟੀ ਕੇਅਰ ਤੁਹਾਡੇ ਹਸਪਤਾਲ ਦੇ ਬਿੱਲ ਦੇ ਉਸ ਹਿੱਸੇ 'ਤੇ ਲਾਗੂ ਹੁੰਦੀ ਹੈ ਜਿਸਦਾ ਭੁਗਤਾਨ ਤੁਸੀਂ ਆਪਣੀ ਜੇਬ ਵਿੱਚੋਂ ਕਰਦੇ ਹੋ — ਜਿਵੇਂ ਕਿ ਕਟੌਤੀਆਂ ਅਤੇ ਸਹਿ-ਭੁਗਤਾਨ। Medicare ਜਾਂ Medicaid ਆਪਣੇ ਹਿੱਸੇ ਦੇ ਬਿੱਲ ਨੂੰ ਕਵਰ ਕਰਨਗੇ, ਅਤੇ ਫਿਰ ਚੈਰਿਟੀ ਕੇਅਰ ਉਸ ਬਕਾਇਆ ਬਿੱਲ 'ਤੇ ਲਾਗੂ ਹੋਵੇਗੀ ਜਿਸ ਦਾ ਭੁਗਤਾਨ ਮਰੀਜ਼ ਨੂੰ ਆਪਣੀ ਜੇਬ ਵਿੱਚੋਂ ਕਰਨਾ ਪੈਂਦਾ ਹੈ।
ਕੀ Medicare ਅਤੇ/ਜਾਂ Medicaid ਵਿੱਚ ਹਰ ਚੀਜ਼ ਦਾ ਭੁਗਤਾਨ ਨਹੀਂ ਕੀਤਾ ਜਾਂਦਾ?
ਇਹ ਜ਼ਰੂਰੀ ਨਹੀਂ ਹੈ। ਬੀਮੇ ਵਿੱਚ ਕਵਰ ਹੋਣ ਵਾਲੀਆਂ ਚੀਜ਼ਾਂ ਤੋਂ ਇਲਾਵਾ ਕਿਸੇ ਵੀ ਹਸਪਤਾਲ ਦੇ ਇਲਾਜ ਨਾਲ ਸਬੰਧਿਤ ਕੁਝ ਖਰਚੇ ਮਰੀਜ਼ ਨੂੰ ਆਪਣੀ ਜੇਬ ਵਿੱਚੋਂ ਦੇਣੇ ਪੈ ਸਕਦੇ ਹਨ। ਇਹ ਪ੍ਰਾਈਵੇਟ ਬੀਮੇ ਉੱਤੇ ਵੀ ਲਾਗੂ ਹੁੰਦਾ ਹੈ।
ਕੀ ਚੈਰਿਟੀ ਕੇਅਰ ਸਿਰਫ਼ ਹਸਪਤਾਲ ਦੀ ਦੇਖਭਾਲ 'ਤੇ ਹੀ ਲਾਗੂ ਹੁੰਦੀ ਹੈ? ਕਲੀਨਿਕ ਮੁਲਕਾਤਾਂ ਦਾ ਕੀ ਹੋਵੇਗਾ?
ਚੈਰਿਟੀ ਕੇਅਰ ਹਸਪਤਾਲ ਤੋਂ ਪ੍ਰਾਪਤ ਕੀਤੀ ਜਾਣ ਵਾਲੀ ਡਾਕਟਰੀ ਦੇਖਭਾਲ 'ਤੇ ਲਾਗੂ ਹੁੰਦੀ ਹੈ। ਹਾਲਾਂਕਿ, ਕਈ ਵਾਰ ਹਸਪਤਾਲ ਜੋ ਕਲੀਨਿਕਾਂ ਨਾਲ ਜੁੜੇ ਹੁੰਦੇ ਹਨ, ਉਹ ਕਲੀਨਿਕਾਂ ਤੱਕ ਆਪਣੀ ਚੈਰਿਟੀ ਕੇਅਰ ਨੀਤੀ ਦਾ ਵਿਸਤਾਰ ਕਰਦੇ ਹਨ। ਸਭ ਤੋਂ ਵਧੀਆ ਗੱਲ ਇਹ ਹੈ ਕਿ ਤੁਸੀਂ ਇਸ ਬਾਰੇ ਉਹਨਾਂ ਤੋਂ ਪੁੱਛ ਸਕਦੇ ਹੋ।
ਕੀ ਇਸ ਵਿੱਚ ਹਸਪਤਾਲ ਦੀ ਐਮਰਜੈਂਸੀ ਵਿੱਚ ਜਾਣ, ਜਾਂ ਐਕਸ-ਰੇ ਕਰਵਾਉਣ ਜਾਂ ਇੱਕ ਦਿਨ ਵਿੱਚ ਹੋਣ ਵਾਲੇ ਇਲਾਜ ਲਈ ਕਵਰ ਮਿਲਦਾ ਹੈ?
ਚੈਰਿਟੀ ਕੇਅਰ ਹਸਪਤਾਲ ਤੋਂ ਪ੍ਰਾਪਤ ਕੀਤੀ ਜਾਣ ਵਾਲੀ ਡਾਕਟਰੀ ਦੇਖਭਾਲ 'ਤੇ ਲਾਗੂ ਹੁੰਦੀ ਹੈ। ਇਸ ਵਿੱਚ ਹਸਪਤਾਲ ਦੀ ਐਮਰਜੈਂਸੀ ਤੋਂ ਕਰਵਾਇਆ ਇਲਾਜ ਸ਼ਾਮਲ ਹੈ। ਇਸ ਵਿੱਚ ਹਸਪਤਾਲ ਵਿੱਚ ਕੀਤਾ ਗਿਆ ਕੋਈ ਵੀ ਹੋਰ ਸਕੈਨ, ਟੈਸਟ ਜਾਂ ਓਪਰੇਸ਼ਨ ਵੀ ਸ਼ਾਮਲ ਹੈ। ਚੈਰਿਟੀ ਕੇਅਰ ਉਹਨਾਂ ਡਾਕਟਰਾਂ ਜਾਂ ਹੋਰ ਪ੍ਰਦਾਤਾਵਾਂ ਦੇ ਬਿੱਲਾਂ ਨੂੰ ਕਵਰ ਨਹੀਂ ਕਰ ਸਕਦੀ ਜੋ ਹਸਪਤਾਲ ਵਿੱਚ ਕੰਮ ਨਹੀਂ ਕਰਦੇ ਹਨ।
ਕੀ ਚੈਰਿਟੀ ਕੇਅਰ ਸਿਰਫ਼ ਭਵਿੱਖ ਦੇ ਬਿੱਲਾਂ 'ਤੇ ਲਾਗੂ ਹੁੰਦੀ ਹੈ, ਜਾਂ ਇਹ ਪਿਛਲੇ ਬਿੱਲਾਂ 'ਤੇ ਵੀ ਲਾਗੂ ਹੁੰਦੀ ਹੈ?
ਚੈਰਿਟੀ ਕੇਅਰ ਭਵਿੱਖ ਦੀ ਦੇਖਭਾਲ ਅਤੇ ਪਿਛਲੇ ਬਿੱਲਾਂ ਦੋਵਾਂ ਉੱਤੇ ਲਾਗੂ ਹੁੰਦੀ ਹੈ। ਇਸ ਗੱਲ ਨਾਲ ਕੋਈ ਫਰਕ ਨਹੀਂ ਪੈਂਦਾ ਕਿ ਬਿੱਲ ਕਿੰਨੇ ਪੁਰਾਣੇ ਹਨ ਜਾਂ ਫਿਰ ਉਹ ਬਿੱਲ ਵਸੂਲੀ ਲਈ ਭੇਜੇ ਗਏ ਹਨ ਜਾਂ ਨਹੀਂ। ਜੇਕਰ ਤੁਸੀਂ ਯੋਗ ਹੋ, ਤਾਂ ਚੈਰਿਟੀ ਕੇਅਰ ਨੂੰ ਤੁਹਾਡੇ ਹਸਪਤਾਲ ਦੇ ਬਿੱਲ ਉੱਤੇ ਲਾਗੂ ਕੀਤਾ ਜਾ ਸਕਦਾ ਹੈ।
ਜਦੋਂ ਮੈਂ ਹਸਪਤਾਲ ਵਿੱਚ ਦਾਖਲ ਸੀ, ਉਦੋਂ ਮੈਨੂੰ 2 ਵੱਖ-ਵੱਖ ਬਿੱਲ ਮਿਲੇ ਸਨ - ਇੱਕ ਹਸਪਤਾਲ ਤੋਂ, ਅਤੇ ਇੱਕ ਡਾਕਟਰ ਤੋਂ। ਕੀ ਇਹਨਾਂ ਦੋਵਾਂ ਬਿੱਲਾਂ ਲਈ ਚੈਰਿਟੀ ਕੇਅਰ ਕਨੂੰਨ ਅਧੀਨ ਵਿੱਤੀ ਸਹਾਇਤਾ ਪ੍ਰਾਪਤ ਕੀਤੀ ਜਾ ਸਕਦੀ ਹੈ?
ਸਿਰਫ਼ ਹਸਪਤਾਲਾਂ ਲਈ ਚੈਰਿਟੀ ਕੇਅਰ ਪ੍ਰਦਾਨ ਕਰਨਾ ਜ਼ਰੂਰੀ ਹੈ। ਕਨੂੰਨ ਅਨੁਸਾਰ ਡਾਕਟਰ ਦੇ ਬਿੱਲ ਯੋਗ ਨਹੀਂ ਹਨ। ਹਾਲਾਂਕਿ, ਬਹੁਤ ਸਾਰੇ ਹਸਪਤਾਲ ਇਹ ਚਾਹੁੰਦੇ ਹਨ ਕਿ ਉਹਨਾਂ ਦੇ ਹਸਪਤਾਲਾਂ ਵਿੱਚ ਕੰਮ ਕਰਨ ਵਾਲੇ ਡਾਕਟਰ ਉਹਨਾਂ ਦੀਆਂ ਚੈਰਿਟੀ ਕੇਅਰ ਨੀਤੀਆਂ ਦਾ ਸਨਮਾਨ ਕਰਨ। ਆਪਣੇ ਹਸਪਤਾਲ ਨਾਲ ਸੰਪਰਕ ਕਰਕੇ ਪਤਾ ਕਰੋ ਕਿ ਕੀ ਉੱਥੇ ਅਜਿਹਾ ਹੁੰਦਾ ਹੈ।
ਜੇ ਮੇਰੇ ਕੋਲ ਇੱਕ ਘਰ ਹੈ ਜਾਂ ਮੇਰੇ ਕੋਲ ਰਿਟਾਇਰਮੈਂਟ ਖਾਤੇ ਹਨ। ਤਾਂ ਕੀ ਇਸ ਕਿਸਮ ਦੀਆਂ ਸੰਪੱਤੀਆਂ ਮੇਰੀ ਯੋਗਤਾ ਨੂੰ ਖਤਮ ਕਰ ਸਕਦੀਆਂ ਹਨ?
ਸਭ ਤੋਂ ਮਹੱਤਵਪੂਰਨ ਗੱਲ ਇਹ ਹੈ ਕਿ, ਚੈਰਿਟੀ ਕੇਅਰ ਯੋਗਤਾ ਦਾ ਮੁਲਾਂਕਣ ਕਰਦੇ ਸਮੇਂ ਹਸਪਤਾਲ ਤੁਹਾਡੀ ਮੁੱਖ ਰਿਹਾਇਸ਼ ਦੀ ਮਲਕੀਅਤ, ਜਾਂ ਇਸਦੇ ਮੁੱਲ 'ਤੇ ਵਿਚਾਰ ਨਹੀਂ ਕਰ ਸਕਦਾ, ਇਸ ਲਈ ਨਿੱਜੀ ਘਰ ਦੀ ਮਲਕੀਅਤ ਦਾ ਚੈਰਿਟੀ ਕੇਅਰ 'ਤੇ ਕੋਈ ਪ੍ਰਭਾਵ ਨਹੀਂ ਪਵੇਗਾ। ਹਸਪਤਾਲ ਯੋਗਤਾ ਦਾ ਮੁਲਾਂਕਣ ਕਰਨ ਲਈ ਕੁਝ ਸੰਪੱਤੀਆਂ 'ਤੇ ਵਿਚਾਰ ਕਰ ਸਕਦੇ ਹਨ, ਪਰ ਥ੍ਰੈਸ਼ਹੋਲਡ ਕਾਫ਼ੀ ਉੱਚੇ ਹਨ ਅਤੇ ਜ਼ਿਆਦਾਤਰ ਖਪਤਕਾਰ ਜੋ ਚੈਰਿਟੀ ਕੇਅਰ ਲਈ ਆਮਦਨ ਅਨੁਸਾਰ ਯੋਗ ਹਨ, ਉਹਨਾਂ ਨੂੰ ਸੰਪੱਤੀ ਦੇ ਆਧਾਰ 'ਤੇ ਬਾਹਰ ਨਹੀਂ ਰੱਖਿਆ ਜਾਵੇਗਾ।
ਕੀ ਚੈਰਿਟੀ ਕੇਅਰ ਅਲਜ਼ਾਈਮਰ ਵਰਗੀਆਂ ਬਿਮਾਰੀਆਂ ਨੂੰ ਵੀ ਕਵਰ ਕਰਦੀ ਹੈ?
ਚੈਰਿਟੀ ਕੇਅਰ ਹਸਪਤਾਲ ਤੋਂ ਪ੍ਰਾਪਤ ਕੀਤੀ ਜਾਣ ਵਾਲੀ ਡਾਕਟਰੀ ਦੇਖਭਾਲ 'ਤੇ ਲਾਗੂ ਹੁੰਦੀ ਹੈ। ਯੋਗਤਾ ਕਿਸੇ ਖਾਸ ਬਿਮਾਰੀ ਦੇ ਅਧਾਰ ’ਤੇ ਨਿਰਧਾਰਤ ਨਹੀਂ ਕੀਤੀ ਜਾਂਦੀ। ਹਾਲਾਂਕਿ, ਕਈ ਵਾਰ ਹਸਪਤਾਲ ਜੋ ਕਲੀਨਿਕਾਂ ਨਾਲ ਜੁੜੇ ਹੁੰਦੇ ਹਨ, ਉਹ ਕਲੀਨਿਕਾਂ ਤੱਕ ਆਪਣੀ ਚੈਰਿਟੀ ਕੇਅਰ ਨੀਤੀ ਦਾ ਵਿਸਤਾਰ ਕਰਦੇ ਹਨ। ਸਭ ਤੋਂ ਵਧੀਆ ਗੱਲ ਇਹ ਹੈ ਕਿ ਤੁਸੀਂ ਇਸ ਬਾਰੇ ਉਹਨਾਂ ਤੋਂ ਪੁੱਛ ਸਕਦੇ ਹੋ।
ਜੇ ਘਰ ਵਿੱਚ ਮੇਰੇ ਨਾਲ ਮੇਰੇ ਬੱਚੇ ਜਾਂ ਪਰਿਵਾਰ ਦੇ ਹੋਰ ਮੈਂਬਰ ਵੀ ਰਹਿੰਦੇ ਹਨ, ਜੋ ਬਾਲਗ ਹਨ, ਤਾਂ ਕੀ ਹੋਵੇਗਾ? ਸਾਡੀ ਯੋਗਤਾ ਕਿਵੇਂ ਨਿਰਧਾਰਤ ਕੀਤੀ ਜਾਵੇਗੀ?
ਚੈਰਿਟੀ ਕੇਅਰ ਦੇ ਨਿਯਮਾਂ ਅਨੁਸਾਰ, "ਜਨਮ, ਵਿਆਹ, ਜਾਂ ਗੋਦ ਲੈਣ ਨਾਲ ਆਪਸ ਵਿੱਚ ਸੰਬੰਧਿਤ ਦੋ ਜਾਂ ਵੱਧ ਵਿਅਕਤੀਆਂ ਦਾ ਸਮੂਹ ਜੋ ਇਕੱਠੇ ਰਹਿੰਦਾ ਹੈ" ਉਸਨੂੰ ਪਰਿਵਾਰ ਆਖਦੇ ਹਨ। ਇਸਦਾ ਮਤਲਬ ਹੈ ਕਿ ਇਕੱਠੇ ਰਹਿਣ ਵਾਲੇ ਬਾਲਗ ਪਰਿਵਾਰਕ ਮੈਂਬਰਾਂ ਦੀ ਆਮਦਨ ਨੂੰ ਚੈਰਿਟੀ ਕੇਅਰ ਦੀ ਅਰਜ਼ੀ ਵਿੱਚ ਵਿਚਾਰਿਆ ਜਾ ਸਕਦਾ ਹੈ। ਆਪਣੀ ਚੈਰਿਟੀ ਕੇਅਰ ਦੀ ਅਰਜ਼ੀ ਵਿੱਚ ਹਸਪਤਾਲ ਨੂੰ ਹਮੇਸ਼ਾ ਆਪਣੀ ਵਿਅਕਤੀਗਤ ਸਥਿਤੀ ਬਾਰੇ ਜ਼ਰੂਰ ਦੱਸੋ ਕਿਉਂਕਿ ਹਸਪਤਾਲ ਵਿਅਕਤੀਗਤ ਸਥਿਤੀਆਂ ਦੇ ਆਧਾਰ 'ਤੇ ਕੁਝ ਅਲੱਗ ਤੈਅ ਕਰ ਸਕਦੇ ਹਨ।
ਵਾਸ਼ਿੰਗਟਨ ਕਿੰਨੇ ਸਮੇਂ ਤੋਂ ਵਿੱਤੀ ਸਹਾਇਤਾ ਦੇਣ ਵਾਲੇ ਹਸਪਤਾਲਾਂ ਦੀ ਸੇਵਾ ਪ੍ਰਦਾਨ ਕਰ ਰਿਹਾ ਹੈ?
ਵਾਸ਼ਿੰਗਟਨ ਦਾ ਅਸਲ ਚੈਰਿਟੀ ਕੇਅਰ ਕਾਨੂੰਨ 1989 ਵਿੱਚ ਪਾਸ ਹੋਇਆ ਸੀ, ਇਸ ਲਈ ਇਹ ਸਹਾਇਤਾ 3 ਤੋਂ ਵੱਧ ਦਹਾਕਿਆਂ ਤੋਂ ਵਾਸ਼ਿੰਗਟਨ ਦੇ ਮਰੀਜ਼ਾਂ ਲਈ ਉਪਲਬਧ ਹੈ।