Other LanguagesE tele alagaoa e maua i lenei gagana.
O lenei auaunaga e fua i tupe maua a le tagata po o le aiga i le tausaga, e mafai ai ona agavaa tagata i le Setete o Uosigitone mo togafitiga fua pe faaitiitia le tau i falemaʻi uma i totonu o le setete. O nei puipuiga e apalai i tau i falema'i e totogiina lava e le tagata, e iai co-pays ma deductibles. O le ituaiga o fesoasoani tau tupe mo le totogiina o pili i le falema'i ua ta'ua o "togafitiga alofa."
I le 2022, na faia ai ni suiga tetele i tapulaʻa o tupe maua mo togafitiga alofa, ma ua mafai ai nei ona agavaa le faitau afe o tagata i le Setete o Uosigitone mo togafitiga fua pe tuuitiitia le tau i falema'i i lalo o le tulafono fou. Mo le sa'ilia pe ete agavaa i togafitiga alofa, asiasi i le uepesite a le Washington State Department of Health (Ofisa o le Soifua Maloloina i le Setete o Uosigitone) (Igilisi) e a'oa'o atili ai i mea e mana'omia i lalo o le tulafono o tupe maua.
Mo le mauaina o togafitiga alofa, e tatau ona e talosaga faatasi ma le falema'i. E iai vaega laiti o mea e mana'omia e falema'i ua faatulagaina e tatau ona mulimulita'i iai i lalo o tulafono ma ta'iala mo togafitiga alofa, peita'i ua tuuina le faatagana i falema'i ina ia fuafua lelei a latou faiga faavae ma le agaga fesoasoani (mo se faata'ita'iga, faia o togafitiga alofa i tagata mama'i e tele lo latou tamaoaiga). O se faiga lelei le siakiina i taimi uma i le konesula o mea tau tupe ile falema'i o loo e mauaina ai togafitiga ina ia a'oa'o atili ai.
Afai e te manatu o le falema'i o e fa'aaogaina e le o mulimulita'ia tulafono, fa'aulu sau fa'aseā i le Loia Sili i le https://www.atg.wa.gov/file-complaint (Igilisi). Afai e te manaomia ni auaunaga faamatala upu pe faaliliu, faamolemole faafesootai mai matou i le (360) 753-6200 ma fesili mo le laina mo gagana.
FESILI MASANI
O a "fesoasoani fa'ameaalofa"?
O le tulafono a Uosigitone mo fesoasoani fa'ameaalofa e mana'omia ai le faia e falema'i o fesoasoani tau tupe mo ma'i e laiti tupe maua i tau o togafitiga latou te totogiina. Mo le malamalama ai, o lea tatou te talanoa i tagata e iai inisiua, e le na'o tagata e leai ni inisiua. O le tele o tagata e feagai ma tau maualuga latou te totogiina tusa pe iai le inisiua, ae o le matou tulafono mo fesoasoani fa'ameaalofa e mafai ona fesoasoani ai i ia tagata ta'ito'atasi.
E iai se tulaga mana'omia i tausaga?
Leai. E leai se tulaga fa'atulagaina i tausaga pe la'itiiti pe matua fa'atoa agavaa lea. E agavaa uma tagata o Uosigitone.
Fa'amata e tatau ona e lesitala i le Medicare poo le Medicaid ina ia fa'aaogaina le fesoasoani fa'ameaalofa?
Leai, o le fesoasoani fa'ameaalofa e apalai i tagata uma o Uosigitone, tusa pe e iai latou inisiua lautele mo togafitiga fa'afoma'i, o inisiua totogiina e le tagata lava ia mo togafitiga fa'afoma'i poo le leai foi o se inisiua. O le fesoasoani fa'ameaalofa e aofia ai tau e te totogiina, tusa poo le a le tulaga o le inisiua, na'o lau tupe maua e fua iai.
Fa'amata e tatau ona avea a'u ma sitiseni a le Iunaite Setete ina ia apalai iai le fesoasoani fa'ameaalofa?
Leai, o tagata mama'i uma e mafai ona apalai iai le fesoasoani fa'ameaalofa tusa poo le a le tulaga o pepa malaga.
Fa'amata e aafia lo'u agavaa ai mo le Saogalemū Lautele, o le Medicare poo le Medicaid pe a maua se fesoasoani fa'ameaalofa?
E leai. E apalai le fesoasoani fa'ameaalofa i le vaega o lau pili o le falema'i lea e te totogiina - e pei o le deductible ma le copay. E tumau pea ona kavaina e le Medicaid ma le Medicare a latou vaega, ona apalai lea o le fesoasoani fa'ameaalofa i le paleni e totoe lea e totogiina lava e le tagata.
E le totogiina e le Medicaid ma/poo le Medicare mea uma?
E le talafeagai. E mafai ona iai tau e totogiina lava e le tagata i togafitiga i soo se falema'i e fua i le vaega o kavaina. E fa'apena foi i inisiua e totogi lava e le tagata.
Fa'amata na'o togafitiga i falema'i e apalai iai le fesoasoani fa'ameaalofa? E fa'apefea siaki i falema'i laiti?
E apalai le fesoasoani fa'ameaalofa i togafitiga fa'afoma'i i se falema'i. Ae peita'i, o nisi taimi o falema'i o loo galulue fa'atasi ma falema'i laiti o le a fa'alautele atu latou fesoasoani fa'ameaalofa i ia falema'i laiti. O le mea pito sili ona lelei e tatau ona faia o le fesili i taimi uma.
Fa'amata e kavaina ai siaki i ER, fa'ata poo fa'agasologa o ma'i tausavali e fa'atinoina i falema'i?
E apalai le fesoasoani fa'ameaalofa i togafitiga fa'afoma'i i se falema'i. E aofia ai togafitiga i potu mo fa'alavelave fa'afuase'i i se falema'i. E aofia ai foi soo se isi fa'ata, su'esu'ega poo galuega fa'asolo e faia i soo se falema'i. E ono le kavaina e le fesoasoani fa'ameaalofa pili mai foma'i poo isi tausi soifua e le'o fa'afaigaluegaina e falema'i.
Fa'amata na'o pili o togafitiga i le lumana'i e apalai iai fesoasoani fa'ameaalofa, pe apalai foi i pili mai togafitiga ua tuana'i?
O fesoasoani fa'ameaalofa mo togafitiga e apalai i vaega uma o pili totogi i le lumana'i fa'apea ma taimi ua te'a. E leai se afaina tusa poo le a le umi o pili totogi e iai, pe sa lafoina foi i le vaega e aoina pili. Afai ete agavaa, e mafai ona apalai fesoasoani fa'ameaalofa mo togafitiga i lau pili o le falema'i.
I le taimi o o'u togafitiga i le falema'i, e lua pili eseese sa ou mauaina - tasi mai le falema'i, ma le tasi mai le foma'i. Fa'amata e agavaa uma pili e lua mo se fesoasoani tau tupe i lalo o tulafono o fesoasoani fa'ameaalofa?
Na'o falema'i e mana'omia lo latou sauniaina o fesoasoani fa'ameaalofa. E le mana'omia e le tulafono le agavaa o pili mai foma'i. Peita'i, o le tele o falema'i e mana'omia foma'i o loo galulue ia latou falema'i ma fa'ataua faiga fa'avae o fesoasoani fa'ameaalofa. Siaki i lau falema'i pe latou te faia.
E fa'apefea pe a iai so'u fale mautū, pe iai se teugatupe o la'u litaea. Fa'amata e fa'aleaogaina ai a'u i ia ituaiga o aseta?
O le mea sili ona tāua, e le mafai e falema'i ona iloiloina sou nofoaga autū, poo lona aogā, pe a iloilo pe e te agavaa i fesoasoani fa'ameaalofa, o lona uiga e leai se afaina o le iai o sou fale mautū i fesoasoani fa'ameaalofa. E mafai ona iloiloina nisi aseta e falema'i mo le agavaa, peita'i e maualuga tulaga o tupe maua ma o le tele o tagata e agavaa mo fesoasoani fa'ameaalofa o le a le iai ona o a latou aseta.
Fa'amata e kavaina e fesoasoani fa'ameaalofa tulaga i tausiga o ma'i e pei o le Alzheimer?
E apalai le fesoasoani fa'ameaalofa i togafitiga fa'afoma'i i se falema'i. E le filifilia lou agavaa ini tulaga fa'apitoa o lou soifua maloloina. Ae peita'i, o nisi taimi o falema'i o loo galulue fa'atasi ma falema'i laiti o le a fa'alautele atu latou fesoasoani fa'ameaalofa i ia falema'i laiti. O le mea pito sili ona lelei e tatau ona faia o le fesili i taimi uma.
E fa'apefea pe afai e iai sa'u fanau matutua, poo nisi tagata matutua o lo'u aiga o matou nonofo fa'atasi i lalo o le fale e tasi? E fa'apefea ona filifilia lo matou agavaa?
E fa'auigaina e le fesoasoani fa'ameaalofa ta'iala fa'aletulafono o se "fa'apotopotoga o le lua poo le sili atu o tagata e fesoota'i ona e aiga, o fa'aipoipoga, poo tagata fai o loo nonofo fa'atasi." O le uiga o lenei mea o tupe maua a tagata matutua o le aiga o nonofo fa'atasi e mafai ona iloiloina i se talosaga mo fesoasoani fa'ameaalofa. Ia mautinoa i taimi uma e fa'amatalaina lou tulaga to'atasi i le falema'i i lau talosaga mo fesoasoani fa'ameaalofa aua e ono faia e falema'i tuutuuga e fua i tulaga o tagata ta'ito'atasi.
O le a le umi na mana'omia ai e Uosigitone falema'i e saunia fesoasoani tau tupe?
O le ulua'i tulafono a Uosigitone mo fesoasoani fa'ameaalofa sa pasia i le 1989, o lona uiga o lenei fesoasoani ua leva ona iai mo tagata mama'i o Uosigitone mo le sili atu ma le tolu sefulu tausaga.